దిల్లీలో జనంపైకి బుల్డోజర్లు..తీవ్ర ఉద్రిక్తత

May 9, 2022

దిల్లీలో జనంపైకి బుల్డోజర్లు..తీవ్ర ఉద్రిక్తత

షహీన్‌బాగ్‌ అక్రమకట్టడాల కూల్చివేతలపై ఎదురుతిరిగిన జనం

Shaheen Bagh: దేశరాజధాని దిల్లీలో బీజేపీ బుల్డోజర్లు జనంపైకి బయలుదేరాయి. దిల్లీలోని షాహీన్‌బాగ్‌ ప్రాంతంలో అక్రమ కట్టడాల కూల్చివేతకు బీజేపీ ప్రభుత్వ ఆదేశాల మేరకు దక్షిణ దిల్లీ మున్సిపల్‌ కార్పొరేషన్‌(ఎస్‌డీఎంసీ) చర్యలు ప్రారంభించింది. అయితే జనం తిరగబడ్డారు. పోలీసులు బలప్రయోగానికి సిద్ధపడ్డారు. అయితే వారు వెనక్కి తగ్గలేదు. దీంతో పారామిలటరీని కూడా దించారు. ఈ పరిస్థితుల్లో ఉద్రిక్తత నెలకొన్నది. నిజానికి దిల్లీలోని ఆప్‌ ప్రభుత్వానికి, ఈ కూల్చివేతలకు ఎలాంటి సంబంధం లేదు. అక్కడ ముస్లిమ్‌లు ఎక్కువమంది వున్నారన్న కారణంతో వారిని నిరాశ్రయులను చేయాలన్న ప్రత్యేక పథకంతో కేంద్రం ఈ చర్యలకు పూనుకున్నట్లు ఆరోపణలు విన్పిస్తున్నాయి. ఇందులో భాగంగానే సోమవారంనాడు షహీన్‌బాగ్‌ ప్రాంతానికి మున్సిపల్‌ అధికారులు, సిబ్బంది బుల్డోజర్లను తీసుకొచ్చారు. అయితే ఈ కూల్చివేతను అడ్డుకుంటూ భారీ సంఖ్యలో ప్రజలు ఆందోళనకు దిగారు. దాదాపు లక్షమంది జనం అక్కడకు చేరుకోవడంతో షాహీన్‌బాగ్‌ వద్ద ఉద్రిక్త వాతావరణం నెలకొంది. ఊహించని పరిస్థితి ఎదురుకావడంతో కేంద్రం అర్థసైనిక బలగాలను, సైనిక సిబ్బందిని రంగంలోకి దించింది. అయినప్పటికీ ఆందోళనకారులు వెనక్కి తగ్గకపోవడంతో కూల్చివేత ప్రక్రియను తాత్కాలికంగా నిలిపివేయాల్సి వచ్చింది. బుల్డోజర్లను అక్కడి నుంచి వెనక్కి పంపించేశారు. సోమవారం ఉదయాన్నే షాహీన్‌బాగ్‌కు బుల్డోజర్లు, జేసీబీలను తరలించారు. అయితే వీటిని చూసిన స్థానికులు, ఆమ్‌ ఆద్మీ పార్టీ, కాంగ్రెస్‌ మద్దతుదారులు అక్కడకు చేరుకుని ఆందోళన చేపట్టారు. వాహనాలకు అడ్డుగా నిలబడి నిరసన చేపట్టారు. దీంతో ఆందోళనకారులను అక్కడి నుంచి పంపించే ప్రయత్నం చేశారు. కొంతమంది నిరసనకారులను పోలీసులు అదుపులోకి తీసుకున్నారు. ఆప్‌ ఎమ్మెల్యే అమనతుల్లా ఖాన్‌ కూడా ఈ ఆందోళనలో పాల్గొన్నారు. ఈ సందర్భంగా ఆయన మాట్లాడుతూ.. ఈ ప్రాంతంలో అక్రమ కట్టడాలను తాము ఇప్పటికే తొలగించామని, అయినా బుల్డోజర్లను పంపించిన భాజపా రాజకీయాలు చేయాలని చూస్తోందని ఆరోపించారు. ఒక దశలో లాఠీఛార్జీకి పోలీసులు పూనుకున్నారు. కొంతమందికి గాయాలయ్యాయి కూడా. ఇటీవలనే జహంగీర్‌పురిలో అక్రమ కట్టడాల కూల్చివేతకు ఉత్తర దిల్లీ మున్సిపల్‌ కార్పొరేషన్‌ చర్యలు చేపట్టడానికి యత్నించగా అక్కడ ఘర్షణలు, ఉద్రిక్తతలు చోటుచేసుకున్నాయి. సుప్రీంకోర్టు జోక్యం చేసుకొని కూల్చివేత డ్రైవ్‌ను నిలిపివేయాలని ఆదేశించింది. తాజాగా షాహీన్‌బాగ్‌ వద్ద కూల్చివేతలు చేపట్టాలని నిర్ణయించింది. ఇక్కడ కూడా బీజేపీ ప్రభుత్వానికి ఎదురుదెబ్బ తగిలింది. దిల్లీలోని పలు ప్రాంతాల్లో అక్రమ కట్టడాల కూల్చివేతకు ఎస్‌డీఎంసీ ఇటీవల యాక్షన్‌ ప్లాన్‌ సిద్ధం చేసిన విషయం తెలిసిందే. (Story: దిల్లీలో జనంపైకి బుల్డోజర్లు..తీవ్ర ఉద్రిక్తత)